Роля прафесійнага перакладу ў збліжэнні народаў

Упершыню ўклад перакладчыкаў у працу міжнародных арганізацый атрымаў дакументальнае прызнанне ў 1976 годзе, калі Генеральная канферэнцыя ЮНЕСКА на сваёй 19-й сесіі ў Найробі прыняла Рэкамендацыю «Аб юрыдычнай ахове правоў перакладчыкаў і перакладаў і практычных сродках паляпшэння становішча перакладчыкаў».

Для таго, каб падкрэсліць уклад прафесіі перакладчыка ва ўмацаванне міжнароднага міру і бяспекі, устойлівае развіццё і прасоўванне правоў чалавека, а таксама ў мэтах захавання шматмоўя і зносін паміж народамі свету на іх родных мовах, 24 мая 2017 года была прынята рэзалюцыя Генеральнай Асамблеі ААН «Роль прафесійнага перакладу ў збліжэнні народаў, умацаванні міру, садзейнічанні ўзаемаразуменню і развіццю».

Распрацоўка рэзалюцыі, сааўтарамі якой сталі дваццаць сем дзяржаў-членаў ААН[1], была ініцыіравана Беларуссю пры падтрымцы Азербайджана.

Унікальнасць рэзалюцыі заключаецца не толькі ў першым у гісторыі Арганізацыі прызнанні перакладу і перакладчыкаў у якасці асноўнага практычнага інструмента захавання шматмоўя ў свеце, падтрымкі культурнай і моўнай разнастайнасці, але і ў замацаванні ролі перакладчыкаў у развіцці міжнароднага дыялогу і пабудове паміж нацыямі мастоў паразумення і даверу ў процівагу «будаўніцтву сцен».

Адным з асноўных элементаў рэзалюцыі стала абвяшчэнне ААН 30 верасня Міжнародным днём перакладу, які адзначаецца штогод з 1953 года ў дзень памяці святога Гераніма, перакладчыка Бібліі, які традыцыйна лічыцца апекуном перакладчыкаў.

З 2005 года па ініцыятыве Дэпартамента па справах Генеральнай Асамблеі і канферэнцыйным кіраванні Сакратарыят ААН праводзіць штогадовы Перакладчыцкі конкурс ім. Св. Іераніма.

У 2010 годзе Мінскі дзяржаўны лінгвістычны ўніверсітэт падпісаў з ААН Мемарандум аб узаемаразуменні, што дало магчымасць студэнтам і магістрантам гэтай ВНУ прымаць удзел у конкурсе ААН.

Цяпер выпускнікі МДЛУ працуюць у рускіх службах вуснага і пісьмовага перакладу, а таксама ў службе стэнаграфічных справаздачу ААН.